生命的光／鄭英兒牧師

聖經：馬太福音5：13～20

2009年是全世界長老教會及歸正教會慶祝長老會創始者約翰．加爾文牧師（John Calvin, 1509-1564）500歲生日的紀念，聖詩113首「我來朝覲祢，救贖我的主」是咱聖詩唯一收錄加爾文所寫的「聖詩」，請咱閣一遍做伙看第3節及第5節的歌詞：「祢就是活命，阮對祢生存，一切的恩惠、才能祢所分；求祢將信實，權能扶持阮，賜阮有氣力贏試煉，純全。除去祢以外別位沒向望，主祢有應允，所信無空空；求賜阮平安、自在及確信，對祢得氣力，互阮永堅心。」今日再次通過加爾文的「信仰告白」引導咱互相提醒，彼此勉勵。通過咱每日人生及生命的學習及見證，盡忠成做「生命的光」，通「一切歸榮光上帝」！

今早起咱做伙通過馬太5：13~20耶穌親嘴所講的話，提醒咱學習成做「生命的光」：

1. 上帝要求咱做生命的光-關懷、疼惜、祝福生命：

馬太福音5：13-16的記載的主題：「鹽及光」，其中有關「鹽」相關的教示記載佇馬可9：50及路加14：34-35，但是只有佇馬太福音5：13及14節這呢明確、清楚通過耶穌的嘴親自對祂的門徒及學生要求講：「恁是地上的鹽」、「恁是世間的光」！耶穌這些話出現佇祂「山頂的教示-八福」（馬太5：1-12）了後，是耶穌對上帝國的子民，受上帝祝福的人特別的提醒及勉勵；耶穌講：「恁是地上的鹽，恁是世間的光」，這呣那是應允及賜福，閣卡是非常「肯定」的使命及責任；耶穌欲提醒咱：對咱每一位基督徒受呼召、受揀選的開始，咱就開始成做地上的鹽、世間的光！

鹽真重要的作用有兩項：第一是互食物有味（調和、增加食物的口味），第二是防止食物的腐敗（互食物通保持、保存閣延長使用的期限）！以色列人獻祭的條例清楚規定：「見若獻做素祭的禮物攏著用鹽調和，佇你素祭的頂面呣通欠缺恁的上帝立約的鹽；你一切的禮物攏著配鹽來獻。」（利未記2：13）。耶穌提醒閣要求每一個時代的教會及基督徒，攏著一方面進入世界成做上帝救恩的見證，分享上帝國的恩典及平安，另外閣卡重要咱著盡力防止世界及社會的腐敗及墮落！若是咱失去「鹹味」，沒法度成做「上帝國的見證」，亦會受世界放棄閣踏。

馬太5：16耶穌特別提醒咱教會及基督徒，必須要成做照佇人的面前的光，通互咱的好行為互世界人類看見來榮光咱的上帝！上帝是世間的光，就是上帝明確閣具體通過教會及基督徒啲見證---上帝的真理、疼痛、公義及信實！咱著盡力、打拼成做燈台頂的光燈，沒下佇燈台下面，咱才有可能關懷、疼惜、祝福每一個生命！

這期（3034期）台灣教會公報的封面主題：「跨宗教為廢除死刑及受害者家屬祈福」，這是報導4月13日暗時由「廢死聯盟」邀請佛教、天主教、基督教及藏傳佛教等代表，佇義光教會做伙舉行的祈福及祈禱會。其實佇20多年前咱總會大專事工委員會所舉辦的大專聖經神學研究班以及「長青團契」就已經有探討「廢除死刑」的議題。真多大專基督徒根據人類每一個人的生命是上帝創造，既然「生命權」在佇上帝，所以「基督信仰」反對「自殺」亦反對「死刑」！何況普世教會大多數亦贊成廢除死刑，所以咱台灣基督長老教會需要嚴肅閣謙卑面對這個「信仰課題」。（請參考3034期教會公報第4及第5版）

2. 上帝期待咱成做生命的光-盡忠實現上帝的旨意：

馬太5：17-20記載耶穌針對「律法」所提出的信仰教示及勉勵，17節耶穌講：「呣通想講我來是欲廢除摩西的律法啊是先知的教示，我來呣是欲廢除，是欲實現。」耶穌閣佇20節進一步提出明確、清楚的期待及要求：「我給恁講：恁若沒比經學教師及法利賽人閣卡忠實遵守上帝的旨意，絕對當入天國。」（現代台語譯本）

馬太5：20台語漢字本翻譯是：「因為我給恁講，設使恁的義無贏過經學士及法利賽人的義，決斷得入天國。」現代中文譯本翻譯：「所以，我告訴你們，你們一定要比經學教師和法利賽人更忠實地實行上帝的旨意才能夠進天國。」沒論中文積極性的講法或是台語消極性的翻譯，共同的結論就是提醒咱每一位基督徒，只要咱盡力忠實遵守閣實現上帝的旨意-咱就是「上帝國的子民」！這是上帝對咱的期待及要求，但仝時陣這閣卡是上帝對咱的應允及賜福！

馬太5：17-20的記載一方面指出耶穌「尊重」舊約以色列人的「律法」（Torah），耶穌確信以色列人的歷史及信仰經驗是上帝獨一無二的啟示；另外一方面耶穌對「律法」的尊重，他明確說明沒欲廢除律法，顛倒是欲來「成全」「實現」律法。耶穌清楚指出祂道成肉體來到世間的目的，就是將充滿公義、疼痛、真理、平安的上帝國「實現」臨到佇世界人類真實生活中間！尤其後來通過耶穌基督死閣復活的歷史見證，引導人類脫離「律法統治的世界」進入「恩典、救贖、疼痛的上帝國」；耶穌通過祂具體「生命的實踐」成全律法最終的目的，賞賜人類--「永遠的拯救及生命的盼望」！這亦是為什麼全世界的教會及基督徒每年用這呢多的時間、精神對全人類「報佳音」分享「大歡喜的好消息」的主要原因。通過耶穌基督的提醒，上帝期待咱做生命的光，通過咱的一生盡忠實現上帝的旨意，互咱四周圍的人攏及咱仝款經驗上帝沒盡的恩典、疼痛及平安！

1983年美國雷根總統宣布自1986年開始，每年1月第3個禮拜一是「馬丁路德金恩日」；亦是美國國定假日，通呼籲美國人民紀念「馬丁路德金恩牧師」對「美國黑人民權運動」的犧牲及貢獻。馬丁路德金恩牧師佇1963年8月28日（34歲）徛佇首都的林肯紀念堂前的樓梯，對超過20萬美國人發表非常有名的演講：「我有一個夢」（I have a dream），深深期待佇美國自由的國家，黑人及白人通成做一家人。1964年因為馬丁路德金恩牧師對黑人民權運動的參與及貢獻得到諾貝爾和平獎。1968年4月4日39歲的馬丁路德金恩牧師佇曼菲斯一間汽車旅館受暗殺死亡（佇林肯總統受暗殺104年後，繼續為著黑人民權運動，犧牲奉獻寶貴的生命），總是的努力及打拼，才有2009年美國產生歷史上第一位黑人總統歐巴馬！

1968年4月3日暗時馬丁路德金恩牧師佇曼菲斯最後的演講「我已經去到山頂」（I have been to the mountain top）演講中他講：「我只有打拼上帝的旨意，祂會允准我爬上山頂，我已經看到上帝應允的土地（Promise land），豈采，我沒一定及恁做伙佇遐。但今暗我愛恁知，咱成做一體的人民，欲做伙前往應允的土地。所以今暗我真歡喜，我沒煩惱任何代誌，我亦沒驚任何一個人，我的目睭已經看見上帝的榮耀！」主耶穌講：「我是好的牧者，好的牧者是為著羊放拺生命。」馬丁路德金恩牧師犧牲自己的生命，親像耶穌基督仝款，盡忠實現上帝的旨意，完成上帝交託的使命及責任。

耶穌基督救贖的恩典是咱「生命的光」，今仔日是咱台北會及七星中會共同所訂「北區大專事工紀念主日」，台灣基督長老教會大專事工的目標是根據路加福音2章52節：「耶穌的智慧及年愈加添，上帝及人嘛愈疼他。」期待每一位大專基督徒通過基督信仰確認自己人生的目標及生命意義，一生努力「榮光上帝，造福眾人」！呼籲咱迫切為大台北地區的「大專長青團契」、大學校園的基督徒教授、老師、職員以及台北大專學生中心的工作者關心代禱，懇求上帝引導學親像耶穌基督-打拼、盡力成做「生命的光」，互咱台灣閣卡多人成做「上帝國的子民」，日日活佇上帝同在閣同行的平安及喜樂中！特別懇請咱眾兄姊為大台北地區大專事工推展需要的經費關心、支持、奉獻及代禱。