幸福人生的旅程／蔡佳君牧師

前言－－基督徒的未來

今早起真歡喜與咱大安教會的兄弟姐妹相與做禮拜，佇未講道的代先，請咱先低頭祈禱：
EX. 旅遊的紀念品
咱的人生住這個世間，聖經甲咱講，活到七十歲算是不錯啦，若是勇壯通到八十歲，今嘛擱加一些保養的智識，多吃一些organic有機食品，通活到一百歲。無論咱的歲數活了有多久？咱佇這個世間的時間是有結束的一日，若親像擱卡好玩、精彩的旅程，攏有結束的一日仝款。咱甘有想過，當咱佇地面上的生命結束的彼一日，咱會當得到什麼來記念咱的人生？今早起咱所讀的經文，是挪亞的大船故事上尾段，挪亞受到上帝啟示，起大船匿大水是舊約聖經﹤創世紀﹥非常有名的故事。這是一個古早發生的故事，但他所講的卻是一個信上帝的人的未來。
EX. 小弟的畫作。
做一個基督徒，我常常觀察看到，咱有時親像其他宗教的信徒仝款，愛問一些關係｢未來｣的問題，若親像對未來欲發生什麼代誌非常好奇，若是聽講有牧者有先知講預言的恩賜，就特別愛去問一些關係家己未來的問題。咱做一個基督徒，所期待的未來是什麼？咱的未來會生做什麼款？甘是活到長歲壽，咱著會當有交代，講咱的人生真幸福，真有意義？若是講上帝俾每一個人的生命攏真公平，就是咱的生命攏會遇到結束的彼一日。若安呢講來，容許我來問大家，當彼一日來到的時，咱會當準備什麼？

一、方舟之恩
當咱詳細讀挪亞起大船匿大水的故事的時，咱就會發現，這位咱所信的上帝，是創造咱生命的主宰，祂是咱的天父，比咱家己擱卡疼惜咱本身的生命。所以，為著咱的生命，為咱備辦拯救的恩典。上帝啟示挪亞起大船的時，就是為著世間人備辦救恩，只是這個救恩所展現的方式真正奧妙，不是咱人會當想像得到的程度，所以，世間人有的講挪亞起笑，伊所勒恥笑的，不僅是這個遵趁上帝旨意的人，也是勒恥笑教挪亞起大船的上帝。兄弟姐妹，有時，咱勒做代誌的時陣，會遇著用家己的方法去做會卡緊，嘛會俾人謳咾真巧；但是若是換做基督徒的方式，或者是上帝的辦法去做，就會俾人笑是憨仔，咱信的上帝嘛是看起來｢阿達阿達｣，甘是勒？若是有這款情形，咱會安怎做？有的人就直接講，上帝的那套｢行不通｣啦，有的人會想欲替上帝辯解，盼望別人M通看咱的上帝是｢阿憨｣。其實，咱M免彼呢著急，上好的辦法是俾上帝做上帝，咱所需要的做的只是｢聽趁上帝的命令｣，未使聽一半，愛完全照上帝所交代的去做，其他剩的交俾上帝，如果，上帝感覺有需要為祂家己辯解，伊自然會安呢做，咱M免代替上帝做上帝。有時，咱定定是｢假鏊｣，咱攏未記得，聖經﹤哥林多前書﹥第1章25節安呢講：｢因為上帝的愚戇比人卡智慧，上帝的軟弱比人卡勇壯。｣

a. 上方舟之前
所以，上帝講大船起佇山頂就起佇山頂，上帝講用什麼材料就用什麼材料。信靠上帝的人佇領受上帝啟示以後，就是起來，將上帝的話行出來，沒比這擱卡簡單的代誌。是咱人真多時陣太過｢龜毛｣，聽著上帝的話無欲去做，托托沙沙，意見一堆。挪亞勒起大船的時，歸架大船是現現起佇世間人面前俾伊看，隨時攏會當登記欲坐船的，實在簡單擱方便。上帝為著世間人所備辦的救恩，看起來是這呢簡單擱方便，但是真多人嫌太簡單啊！天父上帝差遣祂的獨生子耶穌基督為著救贖咱人的罪，來到這個世間，為著咱人的罪，受釘死佇十字架頂，流出寶血，俾咱藉著相信耶穌，會當將家己的罪歸俾耶穌基督，得到赦免。耶穌基督擱從死裡復活，抬贏死亡的威脅、死失的權勢，俾咱人的生命會當因為倚靠主耶穌，得到永遠的活命。這款艱苦著上帝，爽著咱的代誌咱不愛信，這款簡單解決罪所帶來的問題的方法咱不愛信，到底是咱卡憨？抑是上帝對咱太愛疼？不管安怎，世間人會當將真神上帝的命令放一邊，抓準家己有才調選擇救恩，今仔日想到拜這仙，明阿載擱拜另外一仙，生活若像嘛會當過，但是，到人生的落尾才知影，救恩不是咱家己選擇上帝，是上帝選擇咱！

b. 出方舟之後
當大水的災難過去、挪亞出來大船了後，世界已經完全不仝款。這個新世界對挪亞一家人來講是好，抑是壞。好的是，這家夥啊掌權捏！這個新世界沒法律、沒人管挪亞每日欲做什麼？世間沒有比這擱卡好的情形啊！家己做主，M免俾人管。壞的是，新的世界沒人管，一沒小利就容易放縱家己甚至致到犯罪。咱若讀後一章的經文，就會讀到挪亞老大人飲酒醉的代誌。挪亞是義人捏，好人甘會做M對代誌？咱的人生若是走到這個崁站，就知影，想欲做啥就做啥看起來是真幸福，事實上卻是不哩冒險的一件代誌。
EX. 考上大學後，享受自由的生活。

二、獻祭之心
挪亞出大船了後，雖然是一個全新的世界，但是他沒未記得，啥人是這個世界的主人，挪亞想到耶和華上帝，祂為著上帝獻祭。欲按怎獻祭？燒的柴佇叨位嘛M知。樹啊攏尚未生出來，我勒猜，挪亞可能愛拆船仔去燒。沒論獻祭的儀式是什麼，上帝所看重的祭有兩種：痛悔的心與甘心樂意的奉獻。

a. 憂傷痛悔
挪亞有憂傷痛悔無？咱欲安怎通知影？一個從開始就知影上帝一定講話算話，講欲用大水毀滅，就欲落大水，吩咐挪亞講：俾人甘心入來大船，未使勉強，就未當勉強。挪亞豈講攏無家己的意思？豈講未當收人的紅包，放水俾一些朋友入來大船嗎？但是，挪亞家己承擔這一切的心情，當大水降落的時，佇大船內的挪亞一家夥聽到船外哀哭的求叫豈未艱苦？世間人到底為什麼選擇得罪上帝、然後眼睛晶晶看毀滅臨到？挪亞的心裡一定想過這個問題。經過這個人間的地獄，挪亞向上帝所獻的祭M是甘那感謝上帝拯救的大恩若定，一定嘛是充滿痛悔哀傷的心意。知影家己無可能靠家己得著拯救，為著人所做的選擇，所犯著的罪深深來反悔。
EX. 我的奉獻故事=>上帝M是佇我攏準備好的時愛我獻身，是佇我深知我需要祂的時，呼召我全時間做他的工人。

b. 甘心樂意
兄弟姐妹，咱的奉獻不是因為咱有什麼，所以才來獻俾上帝，咱每一擺的奉獻是因為咱表明家己需要上帝所以奉獻。咱透過奉獻，表明家己與上帝無法度分開，咱需要上帝，所以咱欲奉獻；咱與上帝的關係若親近，知影咱所得到的攏是上帝賞賜的，所以咱欲奉獻。奉獻是敬拜上帝的中心，是代表咱甘心樂意的祈禱。

三、虹彩之約
挪亞的獻祭得到上帝接納，所以，上帝顯露祂家己愛疼世間人的心，後悔降落大水毀滅這個世界。上帝用七彩的虹做記號，與挪亞立約，這個約是永遠的約，兄弟姐妹，咱若讀著聖經頂面寫著永遠，咱愛注意，永遠的意思就是以前有效、現在有效、未來有效，是超越時間、空間的限制的意思。上帝與挪亞所立的約永遠有效，安呢的約也藉著耶穌基督佇十字架上替咱流出的寶血，得到更新！耶穌基督佇最後晚餐的時，用所喝的葡萄汁代表祂替世間人所留的寶血，與咱人立新的約，耶穌基督將上帝與挪亞所立的約更新，藉著十字架上所留的寶血，與每一個世間人重新立約，這個約超越時間、空間，永遠有功效，俾人無擱活佇罪惡的管轄中間，無致到永遠的滅亡！

a. 綻放光采與包容
虹的色彩有七種，非常的水，但是咱愛知，咱的眼睛會當看見色彩，是因為有光。透過光不仝款的反射，成做美麗的色彩，上帝的榮光照至咱人的身上，咱因為不仝款的人生經歷，發出不仝款的色彩，有時陣，咱人生的色彩真慘澹，但是佇上帝的圖畫中間，卻是未當取代的色緻。
修女與黑色

b. 永不分離的幸福
兄弟姐妹，咱攏繼續走佇人生的旅程中間，咱欲安怎樣確認人的人生是幸福美滿的人生勒？咱愛看佇咱有限的人生中間，得著什麼記念品？對一個為著保衛國家來爭戰的軍官、或者是每一日與家己的病痛相戰的病人來講，他的身軀所得到的傷痕就是他人生的紀念品；對用心照顧子兒的老父、老母來講，子兒的平安、健康與成就就是伊人生的紀念品；對認真教導學生的老師來講，學生學習著做人的道理，就是她人生的紀念品；對照顧病人真付責任的醫護人員來講，M免擱再看到病人破病的辛苦，病人得到醫好的笑容成做伊人生的紀念品；對一個有良心的政治家來講，俾百姓享受無驚慌、有平安的生活，成做伊人生的紀念品；對一個生理人抑是科學家來講，將家己打拼所生產的成果與四周圍的人做伙分享，成做他人生的紀念品。對咱基督徒來講勒？什麼是咱人生的紀念品？約翰福音第三章16節安呢講：｢因為上帝將獨生的子賞賜世間，互見若信伊的人，未沈淪，會得著永活，伊疼世間到按呢。｣對咱信靠耶穌基督的人來講，永遠活的活命是咱佇這世間的紀念品，｢永生｣不是靈骨塔，死後享受得到。永遠活的活命是從相信主耶穌基督開始得到的紀念品，這個紀念品也是佇咱地面上性命結束的彼一日，會當從地上帶到天頂的紀念品。｢永遠的活命｣所俾咱的盼望，會當幫助咱面對這世間的病痛、危險、挫折與艱難。

結論：所以，基督徒的人生雖然與世間人仝款，會遇著艱苦，但是，咱會當透過耶穌基督的引導，佇苦難中感受到平安與幸福。這就是幸福的人生旅程。咱所承受的，佇上帝的眼中看做是寶貴，是美麗的色彩，是救恩的記號。所以，咱活著的每一日，攏欲見證上帝永無離開咱，咱的受苦成做對咱的利益，為著欲俾人看見不是倚靠咱家己的才調，乃是靠著上帝大大的拯救與恩典。為著安呢，咱的生命變做一幅美麗的圖，充滿豐富恩典的色彩，親像彩虹仝款，是上帝與咱同在、與咱立約的記號。基督徒的未來已經確定啊！咱的幸福是從認識主耶穌開始，因為相信耶穌基督的救恩，佇世間的日子咱就開始享受永遠活的活命，佇幸福人生的落尾站，天頂主人咱的天父上帝佇恩典的厝門口等待咱，這就是咱人生所追求的幸福美滿的結局！