受差遣者／賴弘專傳道

這段經文，是耶穌佇伊欲受出賣、受死的那一暝，為門徒作真深的祈禱，是約翰福音中間有名的耶穌的「大祭司的祈禱」。這個祈禱所關心的，是門徒怎樣佇耶穌無佇身軀邊的情形下面，猶原會通完成耶穌所交代的使命。當耶穌和門徒作伙坐桌的時準，伊將尚重要的時間，用來為門徒祈禱。耶穌知影自己欲離開世間，伊知影，死亡的權勢真強，這群門徒會佇伊受釘的時，四散放捨伊。佇這個重要的時刻，對一群信心無夠、又快要失去耶穌的同在的門徒，耶穌欲怎樣懇求天父呢？
其實，耶穌佇傳道的日子，所做尚重要的代誌，就是將天父的名對門徒顯明。耶穌曾講過，看見伊就是看見天父（14:9），耶穌已經將真光帶互世間人（1:5），這個光，是天父的榮光，顯明上帝真理的本身。耶穌將天父的名，具體顯明出來：佇耶穌好牧者的身上，他們看見天父的疼；當他們結連佇耶穌真葡萄樹的身上，就了解天父的聖潔；對耶穌的言行舉止，門徒知影伊就是通往天父的道路。對這群天父所揀選的門徒，耶穌已經用上帝的話來清氣他們，當他們遵守上帝的話的時，就分別做聖（17:17），會通與這個世間有分別。上帝的話親像種子，種佇門徒的生命內底，透過耶穌基督的用心灌沃、用心栽培，門徒的性命就會得到改變！這款的生命就親像大欉樹，釘根佇上帝的道，生命不枯乾，時時生出青翠的葉仔，帶互世間青青的活氣！

總是耶穌也深知，每一個時代跟隨伊的門徒，攏受到種種的威脅，阻礙他們活出屬天的活命。耶穌的門徒真有可能因為種種艱難，失去彼此的信任與合一；也有可能佇生活、工作的壓力下面，未記得自己受耶穌差遣的身份，失去受差遣的喜樂。若是與信仰的源頭失去結連，整個信仰群體就失去見證的氣力，這是耶穌無願意看到的。

所以頭一項，佇第11節，耶穌就求天父保守門徒，佇這個世間會通惦佇天父的名內面合一，就親像耶穌與天父合一同款。耶穌盼望門徒會通對天父來得到氣力，伊知影當伊行往各各他的時，門徒就欲開始面對黑暗掌權的世界，世間的歹的，也就是邪惡的勢力，會用所有的氣力來打擊門徒的信心。耶穌求天父保守門徒，不只求天父保護他們的性命，更加是求伊保守門徒的心，佇邪惡者暫時作王的時準，佇黑暗用種種的氣力來拆散他們對耶穌的倚靠的時，猶原有見證的勇氣。雖罔世間的黑暗佇耶穌受掠了後，就開始欲拆散門徒，上帝卻聽耶穌的祈禱，保守門徒無受掠（18:9），互他們猶原佇光明中，不陷落佇種種的試煉內底，去順趁世間的方式。所以，耶穌所求的合一，是要門徒佇上帝的光明與疼內底來合一，是佇上帝充滿生命的話內面來合一，要他們與世間人無同，就算是世間黑暗的勢力真強，猶原要保守他們不失落。

耶穌第二項的懇求，就是佇第15節，求天父保守門徒脫離那個歹的，那個邪惡者。邪惡者是誰人？邪惡者是黑暗的勢力，是對敵上帝與耶穌的疼的撒但，伊是世間的掌權者。伊顯明氣力的方式乃是用暴力、用詭詐、用欺騙將人帶離上帝的疼，用死亡的權柄來消除人對永活的盼望，互人因為絕望來順趁世間的道路。耶穌講：這個世間怨恨伊的門徒，抵抵是因為他們有上帝活命的話佇他們的心內，互他們不跟隨邪惡者的腳步。耶穌講，門徒不是屬世間的，是因為他們乃是受上帝所揀召的人。總是，耶穌所求的，並不是門徒會通脫離世間種種的試煉，因為他們佇這個世間猶原有任務。門徒需要了解自己活佇一個充滿暴力與邪惡的世界，尚重要的，是怎樣佇這個世界活出完全不同的性命。

耶穌第三項的懇求，是求上帝用真理，也就是伊的話，互門徒成聖。成聖的意思是互人分別作聖，會通成做上帝聖的用途，這款的聖化不是佇自己的角落，享受自己的聖潔，卻是透過聖潔的活命，為這個罪惡的世界懇求，帶互世界希望。事實上，佇舊約內底，出埃及記19章第6節，就宣告以色列是要佇萬百姓中間，「做上帝祭司的國度，做聖潔的子民。」耶穌的一生，是這款使命尚完全的實現，上帝的子受差遣來到世間，自己聖化獻互上帝，互世間人見若信伊的，攏得著與天父相結連的活命。今耶穌的吩咐，就是這些受聖化的門徒，著進入世間顯明耶穌的活命，耶穌講：「親像[天父]有差我入世間，我嘛差他們入世間。」列位兄弟姊妹，咱看到耶穌要咱做的，就是學習伊受天父差遣的款式，來進入世間成做受差遣的人。當咱對耶穌大祭司的祈禱了解耶穌的心意，就應該知影這款的差遣真有意義：咱受差遣，是要佇一個分裂的世界中間見證合一的性命；咱受差遣，是欲佇一個邪惡者掌權的世界中間顯明耶穌才是人活命的主；咱受差遣，是欲佇一個互世俗影響的世界，活出聖潔的活命。咱活著，不再是為自己，咱親像一粒有活命氣力的種子，埋入這個世界，上帝的話佇咱內底，咱欲佇上帝的時間來生出美的花，也欲生出多多氣力的種子！

1986年有一齣真有名的電影《教會》（The Mission），內底的一個主角Father Gabriel（加百列神父），伊的性命表明一個受耶穌差遣的種子。佇十八世紀的南美洲，伊瓜蘇瀑布的所在有一個原住民的群體，他們住佇真深的樹林內底，進前的宣教師去宣教攏失敗。Father Gabriel是耶穌會的神父，伊決意冒險入去接觸這群人，伊和這群語言不通的原住民做朋友的方式是吹雙簧管，一群帶著武器的原住民勇士本來想欲攻擊伊，卻因為聽到美的音樂聲，將武器收起來，邀請這位青份的神父來相偕住。佇部落內底，Father Gabriel用疼來教他們樂器，教基督教信仰，也和原住民做伙種田，成做共同體。總是這個地上的樂園性命無久長，殖民帝國葡萄牙欲將這個部落拿下來，將原住民賣作奴隸，當葡萄牙和西班牙的聯合軍隊用槍、用炮包圍這個所在的時準，Father Gabriel 面對生命的選擇：是欲呼籲大家拿武器，用暴力對抗暴力，抑是用和平的方式和所疼的人群站作伙。最後，伊選擇和平，和原住民的婦女、兒童圍纍佇教堂的頭前，伊拿一支代表耶穌基督的身體與血的聖體光（聖體光佇天主教的儀式中間是代表耶穌的身體與寶血光照這個世間），相時，伊帶領大家作伙吟詩行向前，當攻擊的軍隊對他們開槍的時，Father Gabriel不幸著槍倒下去，伊手所拿的聖體光也倒落去，真多人也攏受傷死亡，總是佇這個猶原在吟詩、一個一個倒落去的隊伍中間，有一個兒童將落入土腳的聖體光重新拿起來，繼續向前......。

「親像祢有差我入世間，我嘛差你們入世間。」佇這個世界有邪惡者，引誘人去順趁黑暗、順趁殖民的政權、順趁暴力的方式，總是耶穌差遣咱去見證不受邪惡打敗的疼、見證真理的光、見證聖的生命。Father Gabriel學耶穌的款式，帶出一群門徒；面對某所承受的苦難，傳道見證苦難不會成做人生的主，獨獨耶穌羊羔才是伊的主。總是咱攏真軟弱，耶穌也知影咱的軟弱，所以伊為咱祈禱，欲互咱佇這個世間，就算是跋倒，猶原得到保守。無論咱所服事的所在佇叨落，求主幫贊咱會記得咱是受伊差遣的見證者。不知影咱教會現在面對甚麼款的挑戰，兼採咱思考教會怎樣佇社區宣揚福音，兼採咱猶原在尋找一位適當的主任牧師，總是透過耶穌的祈禱，咱佇這款的挑戰中間猶原欲有受差遣的喜樂。也請大家為基隆中山教會代禱，互眾會友會通擒著耶穌所交代的使命，互小朋友感受到天父的疼。當咱快要因為服事的重擔來沉落去的時，求主互咱會記得，咱是受差遣的，咱的生命有天父的道佇中間，互咱歡喜繼續活出耶穌的生命！